غضب واسع في سيدي قاسم بعد “طرد” برلماني لمواطنين من منازلهم (صور)

#قضية_دوار_الكامنة جماعة سيدي عزوز بكل موضوعية:
الدولة فإطار استرجاع الأراضي من المستعمر فالسبعينات فوتتها لصوديا وسوجيطا وهوما بجوج شركتين تابعتين للدولة، صوديا شدات الاراضي السقوية ودارت فيها الحوامض والبواكر، وصوجيطا شدات الاراضي البورية ودارت فيها الحبوب، هاذ التدبير المفوض كانت كتخسر، فيه الشركتين والدولة احتا هي، حيث كتصدق ما رابحة والو معاهم وفوق هادشي كتعاونهم سنويا فالخسارة.
الدولة بانلها هادشي ممسلكش، ناضت فإطار مخطط المغرب الأخضر طلقتهم للكرا وعلنت على المارشي للعموم اللي بالطبع من حق أي واحد يشارك فالسمسرة ديالو ويقدر يتربحلو ايلا التزم بدفتر التحملات، اللي كيما كاع المارشيات اللي كتلانصي الدولة كيكون المشروع قابل للاستمرارية ويراعي مصلحة الشركاء، اللي هوما المستثمر كطرف أول والدولة كطرف ثاني. المستثمر مفروض يربح لفلوس حيث خاسر فلوسو ديال لكرا والتجهيز واليد العاملة. والدولة كتربح أن المستثمرين كيهنيوها من استصلاح هاذ الأراضي اللي كانت غير راكدة. كتولي تنتج منتوج اللي يقدر يتصدر ويدخل العملة الصعبة للبلاد، وايلا تسوق فالمغرب ويرخاص المنتوج بحال هاذ العام اللي ولا الليمون كيتباع بدرهم للكيلو. ويقدر يشريوه الدراوش صحاب القدرة الشرائية الضعيفة، وهاذ المستثمرين كيساهمو فالتشغيل وكيهزو على الدولة الكلفة ديال عدد ديال الناس اللي كيشكلو اليد العاملة النشيطة.
ف2011 شركة (dinadomaine دينا دومين) اللي أحد المساهمين فيها هو أحمد الغزوي اضافة لمستثمرين آخرين رسات اعليهم الصفقة وتربح ليهم المشروع.
تفاصيل المشروع أن شركة دينادومين ستستغل أرضا سقوية مساحتها 136 هكتار لزراعة الحوامض، مقابل أداء سومة كرائية سنوية قدرها 2500 درهم عن كل هكتار لصالح الدولة. اضافة الى مجموعة من الشروط منها ما يتعلق بعدم تغيير النشاط الفلاحي واستمراريته وظروف تشغيل اليد العاملة… الى غير ذلك من الالتزامات التي يحددها بدقة دفتر التحملات.
الشركة ملي تسلمت الأرض خرجت الخبير للمعاينة وتحديد الحدود، لاحظ وادرج ملاحظاتو فالخبرة التي توصلنا بنسخة منها من مندوب الشركة. كتقول هاذ الخبرة أن المدعو ( جلول حيدود ) وهو عامل مياوم ينحدر من دوار اولاد لحمر ضواحي الخنيشات طريق جرف الملحة، يستغل حوالي ثمان هكتارات من المساحة الاجمالية للأرض (136 هكتار) التي اكترتها هذه الشركة، وأنه هذا الشخص مترامي على الملك العمومي، بدون أي وثيقة تخوله الاستفادة او الاستغلال، وأن علاقته بالأرض هو كونه كان يعمل لدى شركة صوديا، كعامل مياوم منذ بداية الثمانينيات، وكان يستقر مع أسرته في منزل طيني يضم السكن وزريبة بهائم وكاعة سيجها ( مزربها) للمحصول الزراعي، في مساحة اجمالية تقدر بثلاث هكتارات، في حين يستغل الخمس الهكتارات الأخرى في زراعة ( التفاح، بوعويد، والشهدية).
هذا ما تضمنته الخبرة، وملي سولنا الناس ديال الدوار، قالوا أن هاذ خينا مترامي اضافة لهاذ 8 دالقطارات ديال صوديا على 25 هكتار ديال صوجيطا. واللي مؤخرا جابلها شي واحد من بركان مقابلهالو ودايرلو فيها البومباج من واد سبو موطور دالسقا فالفيرمة ديال دينادومين اللي كانت دصوديا وواحد آخر فال25 هكتار الأخرى اللي كانت دصوجيطا واللي كل عام كتكرا وكيتعرض هاذ السيد ثاني لماليها وكيمشيو بحالهم. وهادي قضية اخرى ديال استغلال الماء دسبو اللي هو ايضا ملك عمومي بلا رخصة من حوض سبو وبلا تعويض. وداير السقوي والكوطاكوط لثلاثة وثلاثين قطار سقوية بالتمام والكمال فابور والدولة ما داية معاه احتا فرنك.
المشكل أن الشركة ف2018 طلبات من الأملاك المخزنية ( اللي كتمثل الدولة) أنها تسلمليها ديك الأرض اللي مترامي اعليها داك السيد أو تتنازل على السومة الكرائية ديال ديك ال8 الهكتارات وهي خمسين الف ريال للقطار فالعام كتجي بجوج ملاين كتديها الدولة سنويا بلا متستفد منها الشركة. يعني هاد السيد ضيع الشركة فهاد الثمان سنوات ف16 مليون. وهاد الشركة عندها التزامات وتابعا كرا وخدامة اللي كتخلصهم حاليا عددهم ثلاثين من دوار الكامنة والنواحي كيديو شهريا عشرة دالملاين من الشركة. هاد السيد مضيع الشركة ومضيع الدولة فالتعويض ديال السقا اللي مكيخلصوش.
الدولة قالت للشركة سيري دعيه باش يخويلك بلادك وأنا نشهد معاك بورقة نسلمهاليك أنو مترامي على ديك 8 هكتارات.
الشركة مشات تفاوضت مع هاذ السيد جلول وقالت ليه خليك ساكن ومستغل ديك الثلاثة دالقطارات فالسكنى والكاعة والكوارا وخويلي ديك الخمسة دالقطارات اللي دايرها تفاح، راه التفاح كيجيب واحد الدودة مكتناسبش الليمون وكتضروا… وهانتا داي ثلاثة القطارات ربي يخلف فالكرا ديالهم، وهارف على خمسة وعشرين قطار ديال صوجيطا كتفلحها تحت الدف، احسن ما ندخلوا للدعاويوغادي ينوض اعليك الصداع وتورق وتصدق ما انت بديدي ما انت بحب لملوك… السيد طلع للعقبة… ولدوا فالحقيقة اللي طلع للعقبة وكبر كرشو. اما جلول راجل كبير عندو اكثر من 100 عام. وفيما كيجي المنفذ كيخرجو ينشرو فوق حصيرة تما. ودايرلو ديك الحالة. وهي ماشي الحالة ديال واحد كيفلح 33 هكتار سقوية وعندو الزريبة والكسيبة.
الشركة مشات للمحكمة وربحات الدعوى ابتدائيا ومشات تنفذ الحكم. السيد استأنف وبغا يدير وقف التنفيذ رفضتلو المحكمة. وملي اخرج المنفذ دارو ديك الحالة اللي بانت فالفيديو. التبوحيط دالعيالات كيسخفوا ويغوتوا والدرك الملكي انسحب هو والمنفذ.
هذه هي القصة بكل موضوعية… تابعوا تعليقي في المنشور القادم.