د. مراد علمي
حسب بعض المعطيات غادي توصل تحويلات مغاربة العالم حتى 70 مليار درهم حتى التــّـالي ديال هاد العام، أو خير دليل على هاد المبلغ الخيالي هي الطوابير اللي كتـسـنــّـى النوبة قـدّام بيبان أكشاك “ويستر يونين”، هاكدا نقذوا مغاربة أو مغربيات العالم الملايين من المواطنين أو المواطنات من العوز، الحاجة أو الفقر المدقع، إيلا جينا نشوفوا مغاربة العالم قاموا بتحويل كثر من 2000 مليار درهم فى الرّبعين عام التــّـالية، أو %11 حتى %15 ديال المواطنات أو المواطنين كيستافدوا من هاد المعونات المباشرة، بلا عاد الغير المباشرة.
أو كثير منهم كيساهموا بطريقة سخية فى تمويل مشاريع جتماعية أو قتصادية، كاين البعض منهم اللي كيقدّم أموال طائلة قصد تشييد مدرسة فى مسقط الرأس، كاين اللي كيبني بير، جامع ولا ّ كيمد يدّ العون باش تتعبـّـد الطريق أو تقلــّـل من محاين هاد القرية أوْ لوخرى، الحق يقال كاين بعض البرامج الحكومية اللي كيحاولوا إدمجوا خبرة أو مهارات مغاربة العالم، ولكن الوزارة الوصية، فى العمق “قسم” للوزارة الخارجية، براسها سيـيــّـروها لحـدّ الآن مسئولين فى غالب الأحيان ما عندهم حتى شي دراية بهموم الجالية ولا بتطلــّـعاتها، تنصيب هاد الناس خاضع للتوافقات السياسية لا غير، بدون مراعاة الكفاءة ولا ّ الإلمام بموضوع الهجرة أوْ دوافعها.
تحويلات مغاربة العالم كتشكــّـل ركيزة من ركائز قتصاد الدولة المغربية، لأن جميع الواردات، الديون كيتسـدّدوا بالعملة الصعبة، يعني اليورو أوْ الدولار الخ، أو هاد التحويلات كتشكل حتى %40 من الموارد المالية البنكية، رغم الجائحة، يمكن بالعكس بفضل الجائحة العملة، يعني الأموال الطايلة جتاحت البنوك المغربية.
اليوم حسن من غـدّا حنا مـطــّالبين نقوّيوْا تمثيلية الجالية المغربية أو نتحلا ّوْا بالنزاهة أو التفاني فى خدمة المصالح العليا للمملكة بغية الرفع من درجة الرقي أو التطور، أو تنصيب المرأة، الشخص المناسب فى المنصب المناسب، لا يعقل أن بعض الطلبة يبقاوْا حاصلين فى الصين بلا ما يمكن ليهم إمـدّدوا صلاحيات جوازاتهم، مسألة إدارية بسيطة، ما محتاجة لا طلامس لا جهد كبير، بالأخص لمـّـا كتكون صورة البلاد معرّضة للتشهير أو التشويه من بعض الحُـســاد، ولو هاد الناس ما كيدركوش أن الخبث، الحقد أو الضغينة أحسن دليل بتعـلــّـقك بهادا أوْ لاخور، أو عترافك الصادق أو الضمني أنه كيملك خصائص اللي نتا ما عندكش أو ما كرهتيش إكونوا من نصيبك.
جميع المغاربة، المغربيات اللي هاجروا البلاد من أجل خدمة، مستقبل حسن أو حياة مريحة، أو هادي ظاهرة عرفاتها جميع الشعوب، ما خـصــّـناش ننساوْا أن 50 حتى 60 مليون نسمة هربات من أوروبا نظرا للمجاعة أو حروب أهلية من بداية القرن 19 حتى للنص القرن الماضي، الأغلبية الساحقة مشات للشمال أمريكا، الخموس للامريكا الجنوبية أو تقريبا %8 للاوستراليا، حتى الصينيين عرفوا هجرة جماعية مكثفة، بالأخص من الولايات الجنوبية “فودجيان” أو “كـْـوانـْـدون” فى القرن 19، على داك الشي غادي تلقاهم بكثرة فى ماليزيا، فى تايلاند، فيتنام، إندونيسيا أو الفيليبين.
أمــّـا الهجرة للاوروبا من طرف المغاربة كترجع بالأساس للاحتكاك أو القرب من أوروبا، بالأخص إبــّـان الحماية الفرنسية أو الإسبانية، أو كثير من المواطنين تعرّفوا على نمط عيش جديد اللي ما كرهوش يكتاشفوه، يعني من باب حب الاستطلاع أو ضمان لقمة العيش، بريق حياة أفضل كان أو باقي لحد الآن هو من أكبر محفز للهجرة، مع العلم أن الهجرة ماشي حلّ.
لأنه بكل بساطة اللي بغى يقضي حاجة كاين ما يدّار فى البلاد، غير الأموال اللي ضخـّـات الدولة فى كثير من البرامج التنموية أحسن دليل، المشكل، مشكل عقلية، الأغلبية الساحقة ما كرهاتش “صالير” أوروبي بلا ما تضرب تمارة، بالفعل جميع نوع المشاريع، كيف ما كان نوعها، يمكن لينا نعتابروها مخاطرة، أو ضروري تتدرّس “كيفية إنشاء المقاولة” كمادة فى المدارس فى سن مبكـّـر، ولا نبقاوْا متــّـكلين على الوظيفة ولا ّ على الأهل.
جميع الدول الناجحة كتركــّـز على المبادرة الشخصية ماشي على اللي يخدم عليك، على سبيل المثال كتلقى فى الولايات المتحدة درّي صغير ديال 8 سنين عندو فى رصيدو كثر من 100 مليون سانتيم ولا ّ واحد آخور فى عمرو 18 العام مخدّم 20 واحد معاه.
شحال كنفرحوا غير كنشوفوا شابة كتجوب دروبا شي مدينة باش تبيع للناسها “ساندويتشات”، الخدمة كيف ما كان نوعها ماشي عيب، العيب هو تبقى متـقــّـل كاهل عائلتك “بأرا ليـيـّـا”، فى أوروبا اللي محمـّـقة بعض الشباب كتلقى ولد الميلياردير، ولا ّ الميليونير فى القهوى كيسربي ولا ّ خدّام فى لوزين، هاكدا كيعرف بحق الدنيا قبل ما إحـل ّ عينية على محل العمل، ماشي تقول: “هاد البلاد ما عطاتني والو،” نتا بعدا شنو درتي ليها؟ أو كاينين عصاميين مغاربة فى مجال المال أو الأعمال اللي ضربوا تمارة حتى وصلوا، ما تـكــّـلوا على حـدّ، ما مـدّو يدّيهم لحـدّ، ولكن تكلوا على مُخـّهم أو دراعهم، إيلا بغيتي معجزات رجاك فى الله، أو إيلا بغيتي تغيير وضعك عليك بالخدمة أو المعقول.
إن الآراء المذكورة في هذه المقالة لا تعبر بالضرورة عن رأي آشكاين وإنما عن رأي صاحبها.
شكرا بروفيسور مراد علمي، مقالة ممتازة وهادفة، دائما في مستوى الحدث، لك الشكر الجزيل، المزيد من العطاء والتألق.
ابي له علاقة بالموضوع ولكن اريد ان اطلب منكم نشر هدا التعليق لان الخطوط الجوية الغربية اكتر من عام اشتريت تدكرة لم استعملها بسبب كورونا وفي سهر غشت 2020 وحتى الن لتبريدون رد مالتدكرة وانا مقيمة بفرنسا رلا احد يريد الاجابة شكرا على الساعدة
تخرميز